سوفليه الجبنه بالبسطرمة
المكونات:
- 6 بيضات (وحنفصل البياض عن الصفار)
- حوالى ربع كيلو جبن رومى أو شيدر أو ميكس بين الإتنين وأنا باختار الجبنه الرومى الجديدة بتأدى الغرض وبتكون رخيصه شويه
- دقيق حوالى ربع كوبايه
- زبدة على زيت حسب كميه الدقيق حوالى 4 ملاعق
-2 جبنه كيرى ويمكن الإستغناء عنهم
-كوبايه أو أكتر لبن حسب الدقيق
- ملح – فلفل –بودرة توم
- حوالى تمن كيلو بسطرمة مفرومه أو أى طعم بتفضلوه ممكن سوسيس متقطع مكعبات أو زيتون إسود برضه متقطع مفروم
ودى صورة المكونات ماعدا الدقيق والسمن
الطريقه:
- يتم وضع الدقيق والزبدة عالنار ونقلب
- ننزل باللبن عليهم شبه البشاميل بس لازم يكون الخليط سايل
عشان كدة أنا حطيت كوبايه ونصف لبن
- وقبل مايتماسك نحط الجبنه بعد مانكون فرمناها فى الكبه ونقلب لحد أما يسيحوا
-وبعدين نبعد عن النار ونحط صفار البيض حبه حبه بشكل إنسيابى (حلوة إنسيابى دى)
- وبعدين نحط البسطرمة
- وبعدين نحط الملح والفلفل وبودرة التوم وطبعا الملح بيكون بحرص بعد ما بندوق لإن البسطرمة والجبنه فيها ملح
- وبعدين نضرب بياض البيض مع معلقة خل لحد أما نوصل للمارينج
- نضيف المارينج ونقلب بالراحة فى إتجاه واحد زى الكيكه يعنى
- ونحط الخليط فى طاجن مدهون سمنه
- وندخل الطاجن الفرن بس طبعا يكون حار وبعد نصف ساعة نختبر السوا بعصايه
الشيش ولو إستوى نخرجه ما إستواش نسيبه شويه وطبعا الخطوة دى مهمه عشان
الطاجن ما يهبطش بعد ما بيخرج من الفرن (زى الكيكه بالضبط لو مش مستويه من
جوة بتهبط بعد ما بتخرج من الفرن وكمان لو إحمر الوش وما إستوتش من جوه
نستعين بصينيه الميه أم خل)
ودة الشكل النهائى للطاجن
