إزاى تهرب من الجيش

يمر معظم شباب مصر اليومين دول بأزمة نفسية تتلخص في حاجة اسمها "الجيش"، فمن الصعب إنك تلاقى أي أتنين شباب متخرجين قاعدين مع بعض إلا وتلاقي تالتهم الكلام عن الجيش وقد أسعدني الحظ واستمعت إلى حوار شيق من كام سنه بين أتنين شباب، أحدهم حديث التخرج في أحد أماكن تجمع الخريجين ايامها - طبعا القهوة - وكنا مستنين أهم حدث في مصر وقتها، وطبعا هو مباراة الأهلي المصري واتحاد جدة السعودي.

ولما كان الماتش لسه ما بدأش فكان الكل بيتكلم اللي يسال هو الرئيس هايغلي السجاير امتى؟ واللي زعلان من رداءة أنواع الحشيش، أقصد الياميش، لكن اللي شد انتباهي هو كلام الاتنين الشباب دول؛ لأنه كان بيتكلم عن حاجة مهمة جدا لأي شاب اليومين دول وهي إزاي ما تدخلش الجيش. أيام زمان!

قال أكبرهم سنا (وشكله خبير في الهروب من الجيش) زمان كان التجنيد اسمه التجنيد الألزامي مش الإجباري زى دلوقتى، وكان الواحد من دول علشان ما يدخلش الجيش لازم يعمل في نفسه عاهة مستديمة يعنى يقطع لنفسه صباع في إيده ولا رجله وأهو ممكن ربنا يسهلها معاه في الشحاتة بعد كده؛ لأن من الواضح أن مكانش فيه حاجة اسمها كشف طبي على أيام الناس دي ولا حتى دلوقتى لأنك دلوقتي عشان تخرج من الجيش في الكشف الطبي لازم يكون مقطوع لك إيد ولا رجل أو عندك أحد الأمراض اللي لو سعادتك مصاب بيه فعلا مش هاتقدر تروح مشوار مركز التجنيد والانتظار في الزحمة أصلا، كان تكون حضرتك عامل عملية قلب مفتوح أو مستأصل حاجة في المعدة أو مصاب بفيروس (c) أو ربو أو أمراض جلدية مزمنة مثل (الصدفية).

ونظرا لأن الحكومة تريد أن يصبح الجيش بعيدا عن السياسة وفي مأمن منها عشان ماحدش يجنن ويعمل زي الضباط الأحرار لأن ده كان زمن وعدى فعملوا مجموعة من الضوابط اللي تخلى حضرتك في مأمن من التجنيد أهمها أن تكون سعادتك أو احد أقاربك من الدرجة الأولى معتقل سياسي و أنا اعتبر أن دى الحاجة الكويسة اللي جت لأهل العريش من وراء موضوع الاعتقالات إياه لانى ما اعتقدش انه لسه فيهم من لم يعتقل هو شخصيا أو احد أقاربه

, أما إذا لم تكن من اهالى العريش الكرام فانه يتبقى لك فرصة جيدة لان تصبح معتقل وده ممكن عن بعدة طرق أولا من الممكن انك تنضم للحركة الشعبية للتغيير (كفاية) وتخرج معاهم في مظاهرة أو أتنين وتقف في المقدمة وتظهر نفسك كويس لضباط الأمن وسيب الباقي عليهم.

ثانيا من الممكن جداً إنك تروح لأقرب مسجد لأخوانا السنية وتسمع درسين دين وتطلق لحيتك وتلبس الجلباب (مش الحجاب عشان ما تتلغبطش) والسروال وأسبوع ولا أتنين وعلطول هتلاقى نفسك مسجل خطر في أمن الدولة ومش بعيد يمروا عليك في يوم بدري حوالي 3 أو 4 الفجر ويستضيفوك في أحد فنادقهم الخمس نجوم اللي قال عليها الدكتور مجدي النشار، أو لو قلبك جرئ حبتين روح سجل اسمك مع الإخوان المسلمين وبرضه هتطلق اللحية بس مش هتحتاج تلبس الجلباب والسروال ودول يضمنوا لك الاعتقال؛ لأن في إشاعات مالية البلد أن الإخوان ليهم أكثر معتقلين في السجون المصرية وده الكلام اللي أكده أستاذنا محمد عبد القدوس، بس بصراحة أنا ما أضمنلكش حكاية المعتقل دى هتقضى فيها أد إيه؛ لأن الموضوع ممكن يطول ويعدى مدة التجنيد بكتير.
أو اتجوز خواجاية!

وعشان تبعد عن موضوع مدة الاعتقال دى في حاجة تانية ألذ وأجمل من كده وممكن تيجى على مزاجك بس هيه عايزة يكون معاك لغة و ممكن تكلفك شوية فلوس، فممكن حضرتك تلبس شورت وفانلة وكاب وكمان كوتشى (ماركة عالمية طبعا) وتروح أي مزار سياحي من اللي بلدنا مليانه بيهم وتتعرف على واحدة خواجاية شعرها اصفر وعينيها خضر وكلمة في *************** تلف دماغها و تاخدها من ايديها على اقرب ماذون أو سجل مدني وتتجوزها.

وعلى فكرة الموضوع ده ممكن يجى من وراه مصالح كتير أولا يا سيدي ممكن تخليها تسلم وتاخد فيها ثواب و ممكن تقنعها أن العيشة زى الخدامين تحت رجلين أبو الهول وأولاده مش أحسن من العيشة في بلاد بره وهووووب تسافر معاها بره، وتاخد الجنسية وتشتغل هناك وتبقى الاشية معدن وعلى فكرة غسل الصحون بره اللي الناس بتتريق عليه أحسن من شغل كتير في بلاد أبو الهول وعائلته وأصدقائه.
حاجات تانية

وفجأة توقف الشاب الخبرة عن الكلام طبعا مش علشان عربية الحكومة جت ولا حاجه لا عشان الماتش بدأ، وقال لصاحبه (أكملك بعد الماتش) إلا أني ماشوفتوش بعد الماتش، إما انه كان زملكاوي ومشى يفرح في الأهلي بعيد أو لأنه أهلاوي معجبوش أن الأهلي خسرالمهم أنى كنت عايز أعرف باقي الحاجات اللي ما تخليش الواحد يدخل الجيش فياريت اللي يعرفه أو اللي يعرف أي حاجة عن الموضوع ده يفيدنا عشان لو حد عنده جيش و دخل الموضوع .