انـتي فـــين يا امـــــي

غصب عني...صدقيني غصب عني
لما يغلبني الحنين..
لما باشتاقلك ياأمي
وانتي غايبة من سنين
والقي صوتك بيناديني
وبياخدني من سنيني
رغم بعدك عن عيوني
لسة عايشة جوة مني
مش بايــــدي
غصــــب عني
لسة فاكر كل كلمة
من كلامك قولتيهالي
لسة عايش بين دموعك
وابتسامك عمر غالي
لما تجرحني الليالي
مين يداوي الجرح فيا؟؟
مين ياأمي اشكيله همي
غيرك انتي يحس بيا؟
واما تهجرني الحبايب
حضنك الدافي يلاقيني
والقي صوتك بيناديني
وبياخدني من سنيني
رغم بعدك عن عيوني
لسة عايشة جوة مني
مش بايــــــدي
غصــــب عني
الحياه من بعد منك
صدقيني مش حياه
الأماني الحلوة ماتت
والأمل تاهت خطاه
انتي فين؟ محتاج وجودك
نفسي أشكي وتسمعيني
والقي صوتك بيناديني
وبياخدني من سنيني
رغم بعدك عن عيوني
لسة عايشة جوة مني
مش بايــــدي
غصـــــب عني