حاجات تعلّ

يا جماعة هو خلاص كده مفيش فايدة في أي حاجة أي حاجة بتبقى حلوة بترجع أوحش من الأول؟؟

ليه موضوع الزبالة اللي في كل مكان مرمية؟؟ .. ولا الشوارع اللي مش نظيفة؟؟ .. ولا المحلات الكتيرة دي اللي بتحط ادامها 3 متر من البضاعة ومتخليش الناس تقدر تمشي على الرصيف ولا لما يجي ينظف يبقى شايل البضاعة ويبقى حاطط بدالها خشب عشان محدش يعدي ويوسخ الرصيف؟؟

دي بقت حاجة تزهق والله ده غير الأجرة بتاعة المواصلات اللي عمالة تغلى كل شوية كل شوية .. والأكل الغريب اللي بناكله لأن الحاجة كانت الأول شكل وطعم دلوقتي يا شكل يا طعم وخلاص بقت لا شكل ولا طعم .. ولا الصينين اللي ملوا البلد لا دول خلاص احتلوها يجيوا عندنا ويقولوا عندك عروسة نقولها لا تقولي معايا حاجات تشتري حاجات!! .. حاجة تغيظ ما أنا لو عاوزة حاجات حنزل اشتريها من تحت مش حستناكي يعني .. ده غير الكلية اللي المجمع اللي عاملين يجددوا فيه بقالهم سنتين ولسه برضه ولما يخلصوا حينقلوه دي حاجة تعل ده .. غير طريق البحر اللي عاملين يعملوا فيه حاجات غريبة أكنهم بيدورا على كنز الملك فحتوت دي حاجة بجد تعلّ

أنا مش بقول كده عشان أبين إن مفيش حاجة حلوة في بلدنا بس في حاجات سلبية ياما أوي ومحتاجة فعلاً حل ووقفة مننا الأول قبل أي حد تاني