الموقف دة اتصور عايز تذيع قول ذيع مش عايز مش هنذيع(الكاميرا الخفية)

ازيكم يا جماعة
ان شاء الله تكونوا بخير
هحيلكم موقف حصل معايا من شهر كدة ويا رب يعجبكم

مرة اختي كانت بتكلم واحدة صاحبتها ف الموبايل فانا بطلب من اختي حاجة قامت صاحبتها سمعتني فقالتلها قولي لاخوكي لما الكبار يتكلموا العيال تسكت فاختي قالتلي وانا صممت علي الانتقام لاني لاحب التظرف ف غير موضعه
ف استنيت لما اختي خصلت وقولتلها هاتي نمرة موبايل البنت دي قالتلي لا ودي اسرار ومش عارف ايه قولتلها خلصيني انا مش هكلمها احبها يعني انا هخوفها شوية وخلاص ... المهم ادتني النمرة ف كل ما اتصل الاقيها غير متاح فقولتلها طاب هاتي نمرة بيتها بقي وخلاص قالتلي لا دي بقي اللي مينفعش قولتلها متخافيش المهم اتصلت بقي ومجهز المقلب لقيت ابوها اللي رد عليا فانا قولت لو قفلت وكدة ممكن بنته تتأذي بسببي ويفكر انها بتكلم ولاد وكده فقولت اشربه هو المقلب وخلاص
وكان الحوار بينا كالتالي:
انا: الو
الراجل: ايوة مين معايا؟
انا: هو دة منزل الانسة صفاء عباس محمود؟
الراجل: ايوة انا ابوها ...
انا:طيب حضرتك احنا المدينة الجامعية للطالبات في(.......) نعتذر عن ذكر اسم المكان
وعايز ابلغ حضرتك ان بنتك اتفصلت من المدينة عندنا السنة اللي فاتت عشان مدفعت اخر شهرين
الراجل: ازاي الكلام دانا كنت بديها شهر بشهر الفلوس
انا: زي ما بقول لحضرتك كدة ... وبعدين شوفها بتصرفهم ف ايه بقي؟
الراجل: جصدك(قصدك) ايه يعني؟
انا: حضرتك انا عندي ولاد قد بنتك وهما عالمهم غريب ممكن تكون بتصرفهم ع المخدرات انا ابني شخصيا كان كدة
الراجل: لا انا مسمحلكش بنتي متربية اكتر من اي حد
انا: انا بس بديك نصيحة بس المهم انك تتبع التلعيمات بتاعتي دي عشان بنتك ترجع المدينة
بص حضرتك هتروح القاهرة بكرة ف المدينة الجامعية عندنا وتسأل علي الاستاذ اسماعيل مصطفي وحضرتك تدفعله 150 جنيه وتكتب طلب وتجيب ورقتين دمغة وتروح بدري احسن الموظفين بيمضوا ويرحوا بيوتهم بدري
الراجل : بس كدة؟
انا: ايوة بس المهم تروح بدري بس
الراجل: الله يكرمك ويوسع عليك يا رب دة هي لولاك كانت هتنام طول السنة ف الشارع
انا: استغفر الله عمل الخير مش محتاج شكر يا حاج
الراجل: ربنا يخليك لينا يا رب بس مش تجولنا (تقولنا) علي اسمك عشان لو عوزناك ف حاجة واحنا ف القاهرة
ف المهم انا قعدت ادور علي اسم مش لاقي فقولت اول اسم هيجي ف بالي هقولهوله
انا: انا اسمي الاستاذ علي اسماعيل
الراجل: تشرفنا يا استاذ واحنا مش عارفين نشكرك ازاي
انا: تحت امرك يا حاج متشكرنيش المهم تعالي بس بسرعة بكرة عشان تلحق
الراجل: خلاص ماشي مع السلامة
انا : مع السلامة


المهم بعد ما قفلت مع الراجل ولقيته مصدق اوي كدة
فصعب عليا قولت راجل زي دة هيصرف فلوس كتير ف مشوار زي دة وهو راجل بسيط وف الاخر هيروح مش هيلاقي حاجة لا حرام


وهنا كانت الفكرة الجهنميه



هتصل بيه تاني!!


المهم غيرت ف نبرات صوتي واتصلت

انا:الو
الراجل: الو
انا: حضرتك الاستاذ عباس محمود؟
الراجل: ايوة انا مين معايا؟
انا: مش في واحد اتصل بحضرتك من شوية وقالك ان بنتك اتفصلت من المدينة الجامعية؟
الراجل: ايوة
انا : كان بيهزر
الراجل: بيهزر ازاي يعني دة جالي(قالي) هعمل ايه بالظبط هناك ف المدينة عشان يرجعوا البنت
انا: اسمعني بس يا حاج احنا ماسبيرو(مبني الاذاعة والتلفزيون المصري) وحضرتك الفقرة دي اتسجلت عايز تذيع قول ذيع مش عايز مش هنذيع
الراجل: طيب وانتوا عرفتوا نمرتي واسمي منين بجي(بقي)؟
انا: عيب عليك دة احنا ماسبيرو هو في حاجة بتستخبي علينا
الراجل: طيب وحضرتك منين من ماسبيرو؟
انا: من ماسبيرو البلد نفسها
الراجل: انت حتهزر يبني هو في حاجة اسمها ماسبيرو البلد؟
انا: احم احم المهم يا حاج هتذيع ولا لاء ؟
الراجل:متأكد بس انكم كنتوا بتهزروا عشان دة مستجبل(مستقبل) البنت؟
انا: ايوة طبعا يا حاج
الراجل في ذكاء واضح: طيب الحلجة(الحلقة) هتتذاع يوم كام بجي(بقي)؟
انا: يوم 4 رمضان الساعة 7 وربع بعد الفطار
الراجل:طيب علي قناة ايه؟
انا: لا حضرتك دة برنامج اذاعي هيتذاع علي اذاعة نجوم اف ام
الراجل: طيب جولي(قولي) علي اسم حضرتك بس عشان ابجي (ابقي) عارف مين كلمني؟
انا: انا اسامة منير
الراجل: مين اسامه منير دة؟
انا: اسأل بنتك هتقولك
ويلا بقي مع السلامة عشان معندناش وقت
الراجل : طيب مع السلامة ومتبجوش (متبقوش) تهزروا مع مخلايج(مخلايق ربنا) كدة تاني
انا: تحت امرك يا حاج سلام
الراجل: سلام


يا رب يعجبكم
وكل سنة وانتوا طيبين